वीरगञ्जस्थित ब्राइट पब्लिक स्कुल अन्तर्गत ब्राइट स्टुडेन्ट्स क्लबको आयोजनामा शनिवार घण्टाघर क्षेत्रमा गरिब, असहाय र विपन्न वर्गका व्यक्तिहरूलाई लक्षित गर्दै निःशुल्क भोजन वितरण कार्यक्रम सम्पन्न गरिएको छ।
क्लबका अनुसार यस प्रकारको सामाजिक सेवा कार्यक्रम प्रत्येक महिनाको पहिलो शनिवार नियमित रूपमा सञ्चालन हुँदै आएको छ। यस पटकको कार्यक्रम पनि सामाजिक उत्तरदायित्वको भावनाका साथ उत्साहपूर्वक सम्पन्न भएको हो।
कार्यक्रममा ब्राइट पब्लिक स्कुलका निर्देशक मुकेश गुप्ता, प्रधानाध्यापक अनिता गुप्ता, संयोजक गोविन्द गुप्ता, प्रशासन प्रमुख अखिल पटेलसहित क्लबका सक्रिय विद्यार्थीहरूको उल्लेखनीय सहभागिता थियो। सहभागीहरूले स्वस्फूर्त रूपमा खाना वितरण गर्दै समाजमा सकारात्मक उदाहरण प्रस्तुत गरे।
स्कुलका निर्देशक मुकेश गुप्ताले ब्राइट पब्लिक स्कुल शैक्षिक क्षेत्रसँगै सामाजिक सेवामा पनि सक्रिय रहेको बताउँदै यस्ता कार्यक्रमहरूले विद्यार्थीहरूमा करुणा र उत्तरदायित्वको भावना विकास गर्ने विश्वास व्यक्त गरे।
प्रधानाध्यापक अनिता गुप्ताले विद्यार्थीहरूको सक्रियता देखेर आफू गर्वित भएको बताइन्। “यस पहलले समाजमा सकारात्मक सन्देश प्रवाह गर्छ,” उनले भनिन्, “हामीले यस कार्यक्रमलाई निरन्तरता दिनेछौं र समुदायको हितका लागि थप कदम चाल्नेछौं।”कार्यक्रमका आयोजकहरूले आगामी दिनमा सेवा कार्यलाई अझ व्यापक बनाउने प्रतिबद्धता व्यक्त गरेका छन्।
स्थानीय बासिन्दाहरूले भने यस्ता पहलहरू युवाहरूमा बढ्दो सामाजिक चेतनाको प्रतिबिम्ब भएको भन्दै प्रशंसा गरेका छन्। उनीहरूले यस्ता कार्यलाई प्रेरणादायी र अनुकरणीय कदमका रूपमा लिएका छन्।
