कंचनजंगा स्कूलले शैक्षिक सत्र २०८२ का लागि तय गरेको नारा “हाम्रो संस्कृति प्रवर्द्धन गरौँ ”लाई व्यवहारमा उतार्दै आज विद्यालयमा सांस्कृतिक पोशाक दिवस विशेष कार्यक्रमसहित मनाएको छ।
कार्यक्रममा विद्यालयका शिक्षक–शिक्षिका र अधिकांश विद्यार्थीहरू विभिन्न सांस्कृतिक पोशाकमा आकर्षक रूपमा सजिएर उपस्थित भए। यस अवसरमा विद्यालयले तराई क्षेत्रको समृद्ध सांस्कृतिक विरासत र परम्परागत मूल्यहरूको संरक्षण र प्रवर्द्धन गर्नु सबैको साझा दायित्व भएको सन्देश दिएको छ।
विशेष उपस्थितिका रूपमा विद्यालयका निर्देशक माटिन मोक्तानले कार्यक्रममा सहभागिता जनाउँदै भने, “हाम्रो संस्कृति हाम्रो पहिचान हो। यसलाई जोगाउनु र आगामी पुस्तामा हस्तान्तरण गर्नु हाम्रो जिम्मेवारी हो।” उनले विद्यार्थीहरूलाई आफ्नै मौलिकता र विविधता प्रति गर्व गर्न आग्रह गरे।
कार्यक्रममा शिक्षक, विद्यार्थी र विद्यालय परिवारको उल्लेखनीय उपस्थिति रहेको थियो। विद्यालयले समय–समयमा यस्ता कार्यक्रममार्फत सांस्कृतिक विविधतामा एकता र आपसी सद्भाव बढाउन योगदान दिइरहेको जनाएको छ।
