वीरगञ्ज स्थित नारायणी अस्पतालमा विगत झन्डै तीन सातादेखि रेबिजविरुद्धको निःशुल्क खोप (पोष्ट-एक्स्पोजर प्रोफिल्याक्सिस) अभाव हुँदा सेवा लिन आउने बिरामीहरू मारमा परेका छन्। निःशुल्क वितरण गर्ने व्यवस्था भए पनि अस्पतालमा खोप नहुँदा जोखिममा परेका सेवा–ग्राहीलाई बाहिरको औषधि पसलबाट खरिद गरेर ल्याउन सिफारिस गर्नुपरेको अस्पतालका सूचना अधिकारी डा. उदयनारायण सिंहले जानकारी दिए।
डा. सिंहका अनुसार रेबिज खोप केन्द्र सरकारले प्रदेशलाई, र प्रदेशले रेबिज उपचार सेवा दिने अस्पताल तथा संघसंस्थालाई उपलब्ध गराउने प्रणाली छ। तर केन्द्रबाटै खोप नआएकाले नारायणी अस्पतालले सेवा रोक्नुपरेको हो। उनका भनाइमा, अस्पतालले आपूर्ति समस्या लिखितरूपमा प्रदेश आपूर्ति शाखादेखि संघीय तहसम्म जानकारी गराइसकेको छ।
खोपको अभाव केवल नारायणी अस्पतालमा सीमित छैन; पर्सा जिल्लाका अन्य विभिन्न स्वास्थ्य संस्थाले पनि यस्तै समस्या भएको सूचित गरेका छन्। यसले कुकुर वा अन्य जनावरको टोकाइपछि समयमा खोप लिनुपर्ने जोखिमग्रस्त समूहलाई थप असुरक्षित बनाइरहेको स्थानीय स्वास्थ्यकर्मीहरू बताउँछन्।
हाल नारायणी अस्पतालमा दैनिक १० देखि १५ जना रेबिज खोप लगाउन आउँछन्। अस्पतालमा स्टक नभएकाले ती सर्वसाधारणलाई निजी सप्लायर्फ़ बाट खोप खरिद गरी ल्याउन लेखी पठाउने गरिएको डा. सिंहको भनाइ छ। जानकारीका लागि अस्पतालले सूचना टाँस गरी जनतालाई अवगत गराएको छ।
सम्बन्धित निकायहरू सक्रिय भएपछि यसै साउन महिनाभित्र खोप आपूर्ति हुने अपेक्षा गरिएको डा. सिंहले बताए। आपूर्ति भए अस्पतालले पुनः निःशुल्क सेवा सुरु गर्ने जनाएको छ।
