वीरगञ्ज महानगरपालिका–३ मा अवस्थित एमइएस सेकेन्डरी बोर्डिङ स्कुलमा मंगलबार भव्यतापूर्वक विद्यार्थी सपथग्रहण तथा ब्याच वितरण कार्यक्रम सम्पन्न भएको छ ।
कार्यक्रमको उद्घाटन प्याब्सन पर्साका अध्यक्ष सरोज प्रसाद चौधरीले मैनबत्ती बालेर गर्नुभयो । प्रमुख अतिथिको रूपमा उपस्थित चौधरीले एमइएस स्कुल वीरगञ्जकै एक पुरानो र प्रतिष्ठित शैक्षिक संस्था भएको भन्दै विद्यालयको विशिष्ट पहिचान र विद्यार्थीहरूको उपलब्धिको प्रशंसा गर्नुभयो । उहाँले नयाँ नेतृत्व सम्हाल्ने विद्यार्थीहरूलाई सपथ ग्रहण गराउँदै ब्याच वितरण समेत गर्नुभयो र अनुशासन, लगनशीलता र जिम्मेवारीपूर्वक भूमिका निर्वाह गर्न प्रेरणा दिनुभयो ।
यस अवसरमा प्याब्सन केन्द्रीय सदस्य छेडुप लामाले पनि विद्यार्थीहरूलाई अनुशासनको पालना गर्दै नेतृत्वकर्ताको भूमिकामा गम्भीर बन्न आग्रह गर्नुभयो ।
कार्यक्रममा विभिन्न कक्षाका विद्यार्थीहरूले सपथ ग्रहण गर्दै ब्याच ग्रहण गरेका थिए । साथै, कार्यक्रममा प्याब्सनका संस्थापक अध्यक्ष लालबाबु पटेल, मधेस प्रदेश सल्लाहकार मनि पाख्ररिङ, वडा नं. ३ का वडा अध्यक्ष बैजु स्वर्णकार, सशस्त्र प्रहरी निरीक्षक तेजबहादुर ठकुरी तथा सामुदायिक सेवा केन्द्र छपकैयाका अध्यक्ष ग्यासुदिन ठाकुर लगायतको उपस्थिति थियो ।
विद्यालयका संस्थापक इमामुदिन अहमदको अध्यक्षतामा सम्पन्न कार्यक्रममा विद्यार्थीहरूले विभिन्न नृत्य, नाटक तथा सामाजिक सन्देशमूलक प्रस्तुति प्रस्तुत गरेका थिए । विशेषगरी तराई क्षेत्रमा फैलिँदो दाइजो प्रथा विरुद्धको नाटकले सहभागीहरूको ध्यान आकर्षित गरेको थियो ।
कार्यक्रमको सहजीकरण कक्षा १० का महम्मद जिसान र कक्षा ९ की आसिया खातुनले गरेका थिए ।
