रक्सौल, पूर्वी चम्पारण
“भावनाअनुसार दृष्टिकोण जन्मन्छ र जसरी दृष्टिकोण बन्ने गर्छ, कालान्तरमा त्यस्तै भावनाहरू जन्मिन थाल्छन्। भावना र दृष्टिकोण एक अर्काका कारण पनि हुन् र परिणाम पनि। दुवै एक–अर्कामा आश्रित छन्,” लायन्स क्लब अफ रक्सौलका अध्यक्ष तथा मिडिया प्रभारी समेत रहेका सामाजिक कार्यकर्ता लायन विमल सर्राफले पत्रकारहरूसँग साझा गरेका विचार हुन्।
सर्राफका अनुसार एउटै वस्तुप्रति फरक–फरक व्यक्तिको दृष्टिकोण फरक हुन सक्छ। भावनात्मक अस्थिरताबाट नै मनोविकृति पनप्ने बताउँदै उनले आजकल भावनामा हुने उतार–चढाव नै मुख्य चर्चामा रहेको बताए। विशेषगरी घृणा, द्वेष, कुण्ठा जस्ता नकारात्मक भावनाहरू र तिनबाट जन्मिने हिंसाले समाजमा उथलपुथल मच्चाइरहेको उनले उल्लेख गरे।
“बालबालिकादेखि प्रौढसम्मका मानिसहरूले हिंसालाई आफ्नो असन्तुष्टि मेट्ने सजिलो तरिका मान्न थालेका छन्। पहिले अनैतिक घटना कम हुन्थे, तर अहिले ती अत्यधिक बढेका छन्,” उनले भने। “धर्मको नाम बदनाम हुने गरी कतिपय चालाक व्यक्तिहरूले धर्मका संस्थागत स्वरूपको आडमा भावनासँग खेल्दै दुःखी, समस्यामा परेका वा सुखको चाहना राख्ने मानिसहरूको गिरोह बनाएर शोषण गरिरहेका छन्।”
उनका अनुसार हिंसा, लोभ, आसक्ति र भावनाको खेलबाट सामाजिक जीवनमा नकारात्मक प्रवृत्ति बढ्दै गएको छ। तीव्र भावनाले मानिसको निर्णय क्षमता र विवेकमा प्रत्यक्ष असर पार्छ।
सर्राफले भावनालाई मुख्यतः सकारात्मक र नकारात्मक दुई वर्गमा राखी व्याख्या गर्दै भने,
“सकारात्मक दृष्टिकोणले आशावादी प्रवृत्तिका कारण जीवनमा शक्ति र उत्साह भर्ने काम गर्छ, जसले जीवनलाई सफल, सुखद, सरल र समृद्ध बनाउँछ। तर कुदृष्टिकोणले निराशावादी प्रवृत्तिबाट जीवनलाई अन्धकारतर्फ धकेल्दै लैजान्छ। सुदृष्टिकोणले सक्रिय उर्जा सिर्जना गर्छ। यही जीवनको शाश्वत सत्य र मूल नियम हो।”
