वीरगञ्ज महानगरपालिका–२० स्थित पटेलनगर चोकमा राष्ट्रिय स्वतन्त्र पार्टी (रास्वपा) को कोणसभा सम्पन्न भएको छ। मङ्गलबार साँझ पर्सा निर्वाचन क्षेत्र नं. १ अन्तर्गत आयोजित उक्त कार्यक्रममा स्थानीयहरूको उल्लेख्य उपस्थिति रहेको थियो।
कोणसभालाई सम्बोधन गर्दै रास्वपा पर्सा सभापति एवं क्षेत्र नं. १ का उम्मेदवार हरि पन्तले नेपाली जनता अब सचेत र जागरुक भइसकेकाले पुराना शैलीका राजनीति र भ्रमपूर्ण आश्वासन अब नचल्ने बताएका छन्। उनले विगत ३६ वर्षदेखि नेताहरूले जनतालाई झुक्याउँदै आएको आरोप लगाउँदै यसपटक जनता नझुक्किने दाबी गरे। क्षेत्र नं. १ का मतदाताले आफूलाई विजयी गराउनेमा आफू ढुक्क रहेको उनको भनाइ थियो।
कार्यक्रम कृष्ण पस्वानले सञ्चालन गरेका थिए। कोणसभामा जनार्दन सिंह, सगिर आलम, महुमुद्दिन अन्सारी र चन्दन यादवलगायतका नेताहरूले पनि सम्बोधन गरेका थिए। सभामा पटेलनगरका स्थानीय बासिन्दाको ठूलो सहभागिता रहेको आयोजकले जनाएको छ।
