वीरगञ्जको धार्मिक, सांस्कृतिक तथा सामाजिक जीवनसँग गहिरो रूपमा जोडिएको श्री गहवा माईस्थान मन्दिरमा यस वर्ष आयोजना हुन लागेको वृहत रक्तदान कार्यक्रम र तेस्रो डोली यात्रा कार्यक्रमलाई सफल रूपमा सम्पन्न गराउने उद्देश्यले माईस्थान सञ्चालक समितिले महत्वपूर्ण निर्णय गरेको छ। समितिले उक्त कार्यक्रमहरूको व्यवस्थापन तथा समन्वयका लागि गठन गरिएको उपसमितिमा समाजसेवी बृहस्पति फाउण्डेशन नेपालका अध्यक्ष डा. पुरुषोतम दुबे (वीरगञ्ज–६, पर्सा) लाई सदस्यका रूपमा मनोनयन गरेको हो।
माईस्थान सञ्चालक समितिद्वारा जारी गरिएको आधिकारिक पत्रअनुसार डा. दुबेको सामाजिक क्रियाशीलता, धार्मिक कार्यप्रतिको प्रतिबद्धता तथा अनुभवलाई मध्यनजर गर्दै उपसमितिमा समेटिएको उल्लेख गरिएको छ। समितिले डा. दुबेको सहभागिताले कार्यक्रमलाई अझ व्यवस्थित, अनुशासित र प्रभावकारी बनाउने विश्वास व्यक्त गरेको छ। धार्मिक आस्था र सामाजिक सेवाको संगमका रूपमा हेरिँदै आएका यी कार्यक्रमहरू सफल बनाउन सबै पक्षबीच समन्वय आवश्यक रहेकाले उपसमितिको भूमिका महत्वपूर्ण रहने समितिको धारणा छ।
समितिका अध्यक्ष नरेन्द्र कुमार शाह तथा महासचिव विजय कुमार उपाध्यायको हस्ताक्षरसहित जारी पत्रमा डा. दुबेबाट सक्रिय भूमिका र सहयोगको अपेक्षा गरिएको छ। साथै, उहाँको मनोनयनले स्थानीय तहमा सामाजिक सहभागिता र जिम्मेवारीबोधलाई थप सुदृढ बनाउने विश्वास पनि व्यक्त गरिएको छ।
कार्यक्रम अन्तर्गत श्री गहवा माईस्थान मन्दिरको आयोजनामा वृहत रक्तदान कार्यक्रम २०८२ साल १२ महिना ११ गते बुधबार बिहान ७ बजेदेखि सञ्चालन हुने जनाइएको छ। यसैगरी, श्रद्धा, भक्ति र सांस्कृतिक महत्व बोकेको श्री गहवा माईस्थानको तेस्रो डोली यात्रा २०८२ साल १२ महिना १२ गते बिहीबार बेलुका ४ बजे भव्य रूपमा सम्पन्न गरिनेछ। यी दुवै कार्यक्रमले सामाजिक सद्भाव, मानव सेवा र धार्मिक चेतनालाई एकसाथ अघि बढाउने अपेक्षा गरिएको छ।
माईस्थान सञ्चालक समितिले समाजसेवी, भक्तजन तथा सर्वसाधारणलाई कार्यक्रममा सक्रिय सहभागिता जनाई कार्यक्रम सफल बनाउन सहयोग गर्न आह्वान गरेको छ।
