मारवाडी युवा मञ्च र ग्रीन सिटी सामुदायिक सेवा केन्द्र आदर्शनगरको संयुक्त आयोजनामा सञ्चालन भइरहेको “मारवाडी प्रिमियर लिग–३” क्रिकेट प्रतियोगिता अन्तर्गत चौथो दिनका खेलहरू उत्साहपूर्ण वातावरणमा सम्पन्न भएका छन्। प्रतियोगिता वीरगञ्जस्थित आदर्शनगर रंगशालामा जारी रहेको छ।
ग्रीन सिटी सामुदायिक प्रहरी सेवा केन्द्र आदर्शनगरका अध्यक्ष जयप्रकाश खेतानको अध्यक्षतामा सम्पन्न खेलहरूमा खेलाडी तथा दर्शकहरूको उल्लेखनीय उपस्थिति रहेको थियो। स्वर्गीय सुशील कुमार खेतान (टिपु)को स्मृतिमा आयोजना गरिएको उक्त प्रतियोगिता फागुन २९ गतेदेखि सुरु भई चैत १० गतेसम्म सञ्चालन हुने आयोजकले जनाएको छ।
प्रतियोगितामा कुल १० वटा टोली सहभागी रहेका छन् भने प्रतियोगिता अवधिभर २३ वटा खेल खेलाइने कार्यक्रम रहेको छ। प्रतियोगितामा उत्कृष्ट प्रदर्शन गर्ने टोलीलाई विजेता घोषित गरिनेछ। विजेता टोलीले ४ लाख रुपैयाँ नगद पुरस्कार प्राप्त गर्नेछ भने उपविजेताले २ लाख ५० हजार रुपैयाँ नगद पुरस्कार पाउने प्रतियोगिता संयोजक केशव खेतानले जानकारी दिएका छन्।
चौथो दिनको पहिलो खेलमा ड फोग फाइटर कैलाश र धौलागिरी बौदिमाईबीच प्रतिस्पर्धा भएको थियो। उक्त खेलमा ड फोग फाइटर कैलाशले १५ ओभरमा ९ विकेट गुमाउँदै १३१ रन बनाएको थियो। जवाफी ब्याटिङमा धौलागिरी बौदिमाईले १४.५ ओभरमा ५ विकेट गुमाउँदै १३२ रन बनाउँदै ५ विकेटले जित हासिल गरेको थियो।
त्यसैगरी चौथो दिनको दोस्रो खेलमा अन्नपूर्ण टाइगर र निलगिरी जगर्सबीच प्रतिस्पर्धा भएको थियो। खेलमा अन्नपूर्ण टाइगरले १२ ओभरमा ६ विकेट गुमाउँदै ११९ रन बनाएको थियो। लक्ष्य पछ्याएको निलगिरी जगर्सले १२ ओभरमा ५ विकेट गुमाउँदै ११० रन मात्र बनाउन सकेपछि अन्नपूर्ण टाइगर ९ रनले विजयी भएको थियो।
प्रतियोगिताका खेलहरू हेर्न स्थानीय खेलप्रेमीहरूको उल्लेखनीय उपस्थिति रहने गरेको आयोजकले जनाएको छ। प्रतियोगिता आगामी दिनहरूमा अझ रोमाञ्चक हुने अपेक्षा गरिएको छ।
