मधेश विश्वविद्यालय एकपछि अर्को विवादमा तानिएको छ। विश्वविद्यालयका प्रशासन कर्मचारी राजु राउत गद्दी पक्राउ परेपछि संस्थाभित्रको पारदर्शिता, भर्ती प्रक्रिया र व्यवस्थापनमाथि गम्भीर प्रश्न उठेका छन्।
कर्मचारी पक्राउ परेपछि विश्वविद्यालयका उपकुलपति दिपक बहादुर शाक्य द्वारा हस्ताक्षरित आधिकारिक सूचना जारी गरिएको छ। उक्त सूचनामा घटनाबारे औपचारिक जानकारी दिइएको भए पनि त्यसपछि देखिएका गतिविधिले थप आशंका जन्माएको छ।
विशेषगरी, विश्वविद्यालयको आधिकारिक सामाजिक सञ्जाल पेजमा टिप्पणी (कमेण्ट) खण्ड बन्द गरिएको विषयले आलोचना बढाएको छ। आलोचकहरूले यसलाई विश्वविद्यालय प्रशासनले आलोचना दबाउन र आफ्ना कर्मचारीलाई जोगाउन खोजेको कदमका रूपमा व्याख्या गरेका छन्।
यसैबीच, मोहम्मद लालबाबु राउत गद्दी का परिवारका सदस्यहरूलाई प्राथमिकता दिँदै विश्वविद्यालयलाई “भर्ती केन्द्र” का रूपमा प्रयोग गरिएको आरोप पनि सार्वजनिक रूपमा उठिरहेको छ। यद्यपि, यी आरोपहरूबारे विश्वविद्यालय प्रशासन वा सम्बन्धित पक्षबाट औपचारिक प्रतिक्रिया आएको छैन।
शिक्षा क्षेत्रसँग प्रत्यक्ष सरोकार राख्ने संस्थामा यस्ता विवादले समग्र शैक्षिक वातावरण र विश्वसनीयतामा नकारात्मक असर पार्ने सरोकारवालाहरूको भनाइ छ। नागरिक समाज तथा विद्यार्थीहरूबीच पारदर्शिता, निष्पक्ष भर्ती प्रक्रिया र जवाफदेहिताको माग बढ्दै गएको छ।
यस घटनापछि विश्वविद्यालय प्रशासनले स्पष्ट र विश्वसनीय धारणा सार्वजनिक गर्दै उठेका प्रश्नहरूको जवाफ दिनुपर्ने आवश्यकता देखिएको छ। साथै, सरोकारवाला निकायहरूले निष्पक्ष छानबिन गरी सत्यतथ्य बाहिर ल्याउनुपर्ने माग पनि जोडतोडले उठ्न थालेको छ।
