जीवन ज्योति स्कूल इन्टर्याक्ट क्लबले आफ्नो दोस्रो स्थापना समारोह २०८२ साल भदौ २ गते सोमबार सम्पन्न गरेको छ। यससँगै सामुदायिक सेवा, नेतृत्व र युवा सशक्तिकरणमा केन्द्रित नयाँ कार्यकालको शुरुवात भएको छ।
कार्यक्रम अन्तर्गत सिद्धि कर्ण क्लबको दोस्रो अध्यक्षका रूपमा औपचारिक रूपमा पदस्थापना भए। साथै १३ सदस्यीय नयाँ कार्यसमिति शपथग्रहण गर्दै इन्टर्याक्टका मूल्य र सिद्धान्तलाई पालन गर्ने प्रतिबद्धता व्यक्त गर्यो। नयाँ कार्यसमितिमा उपाध्यक्ष अनुराग साह, सचिव एन्जल रौनियार, कोषाध्यक्ष खुशी गोयल लगायत रहेका छन्।
समारोहमा प्रमुख अतिथि रोटरी क्लब अफ वीरगञ्ज मेट्रोपोलिसका अध्यक्ष रोटेरियन संजय जोशी, विशिष्ट अतिथिहरू जीवन ज्योति स्कूलका प्रिन्सिपल श्री शिव गुप्ता र रोटेरियन अनिल जैसवाल (पब्लिक इमेज चेयर, रिजन ६, RID 3292) को उपस्थितिले कार्यक्रममा महत्व थपेको थियो। यसले विद्यालय र रोटरी समुदायबीचको गहिरो साझेदारीलाई पनि प्रष्ट पारेको छ।
कार्यक्रममा विद्यालयका विद्यार्थीहरूले स्वागत कार्यक्रम प्रस्तुत गरेका थिए भने क्लबको विस्तृत प्रतिवेदन पनि प्रस्तुत गरिएको थियो। अन्त्यमा नयाँ नेतृत्वमा आगामी वर्ष प्रभावकारी परियोजनाहरू सञ्चालन गर्ने दृढ संकल्पसहित कार्यक्रम सम्पन्न भयो।
