अभिलाष गुप्ता
वीरगञ्ज, १६ जेठ
वीरगञ्जका दुई परिवारले आफ्ना दिवंगत सदस्यहरूको आँखा दान गरी मानवता, सेवा र सामाजिक उत्तरदायित्वको प्रेरणादायी उदाहरण प्रस्तुत गरेका छन्। उनीहरूको यो निर्णयले दृष्टिविहीन व्यक्तिहरूको जीवनमा नयाँ आशा र उज्यालो भर्ने मार्ग प्रशस्त गरेको छ।
वीरगञ्ज निवासी स्वर्गीय शंकरलाल सरावागीका छोरा आशिष सरावागी र प्रदीप सरावागी तथा स्वर्गीय लक्ष्मणबहादुर श्रेष्ठका छोरा सुदर्शन श्रेष्ठले आफ्ना परिवारका दिवंगत सदस्यहरूको आँखा दान गर्न सहमति जनाएका हुन्। उनीहरूको यस मानवीय कार्यबाट दुई दृष्टिविहीन व्यक्तिले पुनः दृष्टि प्राप्त गर्ने सम्भावना बढेको छ।
तेरापन्थ युवक परिषद् वीरगञ्जको समन्वय तथा सहयोगमा केडिया आँखा अस्पतालको चिकित्सक टोलीले सफलतापूर्वक आँखा सङ्कलन गरेको थियो। भारत–नेपाल सीमावर्ती क्षेत्रमा आँखा दानप्रति बढ्दो जनचेतना समाजका लागि सकारात्मक सन्देश भएको सरोकारवालाहरूले बताएका छन्।
लायन्स इन्टरनेशनलका आजीवन सदस्य लायन राधेश्याम खेतानले दुवै परिवारको निर्णयको प्रशंसा गर्दै यसलाई मानव सेवाको उत्कृष्ट उदाहरण बताएका छन्। उनले मृत्युपछि पनि अरूको जीवन उज्यालो बनाउने कार्यलाई साँचो परोपकारको रूप माने।
त्यसैगरी, लायन्स क्लब अफ रक्सौलका अध्यक्ष, मिडिया इन्चार्ज तथा सामाजिक अभियन्ता बिमल कुमार सर्राफले “सेवा नै सत्य हो” भन्ने भावनालाई आत्मसात गर्दै आँखा दानलाई जीवनपछिको सबैभन्दा महान सेवामध्ये एक बताएका छन्। उनले आँखा दानमार्फत एक व्यक्तिको मृत्युले अर्को व्यक्तिको जीवनमा उज्यालो ल्याउन सक्ने उल्लेख गरे।
भारत विकास परिषद् शाखा–रक्सौलका अध्यक्ष रजनीश प्रियदर्शीले मृत्यु जीवनको अन्त्य मात्र नभई अर्को आशा र प्रकाशको सुरुवात पनि हुन सक्ने बताए। उनले आँखा दानजस्तो महान कार्यमा सहभागी हुन सबैलाई प्रेरित गर्दै मृत्युपछि आँखा दान गर्ने प्रतिज्ञा गर्न आग्रह गरे।
यस मानवीय कार्यप्रति नेपालका प्रथम अन्तर्राष्ट्रिय निर्देशक ई. लायन संजय खेतान, प्रस्तावित अन्तर्राष्ट्रिय निर्देशक लायन राजन लम्साल, पूर्व अन्तर्राष्ट्रिय निर्देशक लायन बालकृष्ण बुर्लाकोटी, बहु परिषद् अध्यक्ष लायन केशर भण्डारी, जिल्ला गभर्नर लायन विनय बस्नेत, जिल्ला गभर्नर लायन नवराज सापकोटा, लायन सुशीला शाह, लायन नरोत्तम पाण्डे, लायन पिया सिंह, लायन प्रसिद्धि आनन्द सिंह, रोटेरियन अफ नेपाल, भारत विकास परिषद् शाखा–रक्सौलका सम्पर्क संयोजक उमेश सिकरिया तथा लायन्स क्लब अफ रक्सौललगायत विभिन्न सामाजिक संस्थाका प्रतिनिधिहरूले श्रद्धाञ्जली अर्पण गरेका छन्।
लायन्स क्लब अफ रक्सौलका अध्यक्ष बिमल कुमार सर्राफ तथा भारत विकास परिषद् रक्सौलका सेवा संयोजक एवं मिडिया इन्चार्ज बिमल कुमार सर्राफले संयुक्त रूपमा जानकारी दिँदै आँखा दान अभियानलाई थप प्रभावकारी बनाउन समाजका सबै वर्गको सहभागिता आवश्यक रहेको बताएका छन्।
