अभिलाष गुप्ता
रक्सौल, असार १४
भारतको राष्ट्रिय पल्स पोलियो अभियानअन्तर्गत आइतबारदेखि सुरु भएको विशेष अभियानको शुभारम्भ रक्सौल रेलवे स्टेशनको प्लेटफर्म नम्बर–१ बाट गरिएको छ। २०८३ असार १४ (२८ जुन २०२६) देखि असार १८ (२ जुलाई २०२६) सम्म सञ्चालन हुने अभियानको औपचारिक उद्घाटन गरिएको हो।
प्राथमिक स्वास्थ्य केन्द्र, रक्सौलका प्रभारी डा. राजीव रञ्जनको नेतृत्वमा आयोजित कार्यक्रममा रक्सौलका प्रखण्ड विकास पदाधिकारी जयप्रकाशले ० देखि ५ वर्ष उमेरका बालबालिकालाई पोलियोविरुद्धको दुई थोपा औषधि पिलाएर अभियानको शुभारम्भ गरेका थिए।
अभियानका क्रममा रेलवे स्टेशनमा आवतजावत गर्ने यात्रुका ० देखि ५ वर्ष उमेरका बालबालिकालाई पोलियोको खोप खुवाइएको थियो। साथै अभिभावकलाई आफ्ना सबै साना बालबालिकालाई अनिवार्य रूपमा पोलियोको खोप खुवाउन आग्रह गरिएको थियो।
अभियानमा भारत विकास परिषद्, रक्सौल शाखाले पनि सक्रिय सहभागिता जनाएको थियो। परिषद्का सदस्यहरूले प्लेटफर्ममा रहेका यात्रुहरूलाई आफ्ना ० देखि ५ वर्षसम्मका बालबालिकालाई पोलियोको औषधि खुवाउन आग्रह गर्नुका साथै अभियानबारे जनचेतना फैलाएका थिए। पोलियो खोपबारे रहेका भ्रम र गलत धारणालाई हटाउन पनि परिषद्ले महत्वपूर्ण भूमिका निर्वाह गरेको थियो। सदस्यहरूले अभिभावकलाई पोलियोको दुई थोपा औषधि पूर्ण रूपमा सुरक्षित रहेको र प्रत्येक अभियानमा सबै बालबालिकालाई यो खोप अनिवार्य रूपमा खुवाउनुपर्ने जानकारी दिएका थिए।
कार्यक्रममा स्टेशन अधीक्षक अजय राम, डा. एस.के. सिंह, डा. अमित जायसवाल, भारत विकास परिषद् रक्सौल शाखाका अध्यक्ष रजनीश प्रियदर्शी, परिषद्का सक्रिय सदस्य अजय कुमार, प्राथमिक स्वास्थ्य केन्द्रका स्वास्थ्य प्रबन्धक आशिष कुमारलगायत चिकित्सक तथा स्वास्थ्यकर्मीहरूको उपस्थिति रहेको थियो।
यस अवसरमा वक्ताहरूले पोलियोजस्तो गम्भीर रोगबाट बालबालिकालाई सुरक्षित राख्न प्रत्येक अभिभावकको सहयोग आवश्यक रहेको बताए। उनीहरूले असार १४ देखि १८ गतेसम्म सञ्चालन हुने अभियानका क्रममा ० देखि ५ वर्ष उमेरका सबै बालबालिकालाई पोलियोविरुद्धको दुई थोपा औषधि अनिवार्य रूपमा खुवाई “हरेक बालबालिका सुरक्षित, पोलियोमुक्त भारत” बनाउने अभियानलाई सफल बनाउन सबैसँग आग्रह गरे।
प्रभारी डा. राजीव रञ्जनले अभियानमा भारत विकास परिषद् रक्सौल शाखाले खेलेको सक्रिय भूमिकाको प्रशंसा गर्दै अभियान सफल बनाउन पुर्याएको सहयोगप्रति आभार व्यक्त गरे।
