बारा जिल्लाको प्रसौनी गाउँपालिका–२ स्थित श्री बेङ्गा साह माध्यमिक विद्यालय तथा पुस्तकालय भवन निर्माण कार्य नेपाल–भारत विकास सहकार्यअन्तर्गत औपचारिक रूपमा सुरु गरिएको छ।
२०८२ साल चैत ३० गते आयोजित एक समारोहबीच भारतका वीरगञ्जस्थित महावाणिज्य दूतावासका महावाणिज्यदूत देवी सहाय मीना र प्रसौनी गाउँपालिकाका अध्यक्ष बिनोद प्रसाद जैसवालले संयुक्त रूपमा भवनको शिलान्यास गर्नुभयो।
भारत सरकारको अनुदान सहयोगमा करिब ४ करोड रुपैयाँ लागतमा निर्माण हुन लागेको उक्त परियोजना उच्च प्रभाव सामुदायिक विकास परियोजना (एचआईसीडीपी) अन्तर्गत सञ्चालन भइरहेको छ। यस परियोजनाअन्तर्गत तीन तले दुई वटा भवन निर्माण गरिनेछन्, जसमा १२ वटा अतिरिक्त कक्षाकोठा, क्यान्टिन, भोजनालय, पुस्तकालय, कम्प्युटर तथा विज्ञान प्रयोगशालाहरू स्थापना गरिनेछन्।
कार्यक्रममा बोल्दै महावाणिज्यदूत मीनाले यस परियोजनाले स्थानीय विद्यार्थीहरूका लागि गुणस्तरीय शिक्षामा पहुँच सहज बनाउने विश्वास व्यक्त गर्नुभयो। उहाँले एचआईसीडीपी कार्यक्रमलाई नेपाल–भारत विकास साझेदारीको महत्वपूर्ण अंगको रूपमा उल्लेख गर्दै शिक्षा, स्वास्थ्य तथा पूर्वाधार विकासमा भारत सरकारको निरन्तर सहयोग रहने बताउनुभयो।
हाल मधेश प्रदेशमा भारत सरकारले स्वीकृत गरेका ८७ वटा परियोजनामध्ये ६१ वटा सम्पन्न भइसकेका छन् भने २६ वटा कार्यान्वयनको चरणमा रहेका छन्। तीमध्ये ५२ वटा परियोजना शिक्षा क्षेत्रसँग सम्बन्धित रहेका छन्। बारा जिल्लामा स्वीकृत ४ परियोजनामध्ये ३ वटा सम्पन्न भइसकेका छन् भने एक निर्माणाधीन अवस्थामा रहेको छ।
यसैगरी भारत सरकारले हालसम्म नेपालभर १०४९ वटा एम्बुलेन्स र ३८१ वटा विद्यालय बस उपलब्ध गराइसकेको छ। मधेश प्रदेशमा २३२ एम्बुलेन्स र ४० विद्यालय बस तथा बारा जिल्लामा ४० एम्बुलेन्स र ६ विद्यालय बस वितरण गरिएको जानकारी दिइयो।
हाल विद्यालयमा करिब २४०० विद्यार्थी अध्ययनरत छन्। नयाँ भवन निर्माणसँगै शैक्षिक पूर्वाधार थप सुदृढ भई विद्यार्थीहरूले सुरक्षित, आधुनिक तथा सुविधासम्पन्न वातावरणमा अध्ययन गर्न पाउने अपेक्षा गरिएको छ।
कार्यक्रमको अध्यक्षता गर्दै गाउँपालिका अध्यक्ष जैसवालले निर्माणाधीन भवनले स्थानीय शिक्षा क्षेत्रको गुणस्तर अभिवृद्धिमा महत्वपूर्ण योगदान पुर्याउने विश्वास व्यक्त गर्नुभयो। उहाँले परियोजना समयमै सम्पन्न गरी प्रभावकारी रूपमा सञ्चालनमा ल्याउन गाउँपालिकाले आवश्यक सहजीकरण गर्ने प्रतिबद्धता जनाउनुभयो र भारत सरकारप्रति आभार व्यक्त गर्नुभयो।
कार्यक्रममा गाउँपालिकाकी उपाध्यक्ष किरण देवी साह, प्रमुख प्रशासकीय अधिकृत नवीन कुमार श्रीवास्तव, स्थानीय जनप्रतिनिधि, शिक्षक, अभिभावक तथा सर्वसाधारणको उल्लेख्य उपस्थिति रहेको थियो।
