अभिलाष गुप्ता
बीरगञ्ज,२४ बैशाख
ठाकुरराम बहुमुखी क्याम्पसमा यही २०८१ सालको चैत्र ५ गते सम्पन्न स्ववियु (स्ववियु) निर्वाचनमा भएको भनिएको धाँधली, फर्जी नामांकन तथा फर्जी मतदानबारे छानबिन गर्न माग गर्दै संयुक्त विद्यार्थी संगठनले पर्साका प्रमुख जिल्ला अधिकारी गणेश अर्याललाई ज्ञापनपत्र बुझाएको छ।
विद्यार्थी संगठनले निर्वाचनमा गम्भीर अनियमितता भएको भन्दै विभिन्न संगठनहरुले पूर्वमै सार्वजनिक असन्तुष्टि प्रकट गरिसकेको उल्लेख गर्दै, निष्पक्ष छानबिन र जवाफदेहिताको माग गरेका छन्।
ज्ञापनपत्रमा उल्लेख भएअनुसार, जिल्ला प्रशासन कार्यालयको पहलमा यस विषयमा छानबिन समिति गठन गरिएको जानकारी सार्वजनिक भए पनि अहिलेसम्म समितिको अनुसन्धानको अवस्था, प्रारम्भिक निष्कर्ष वा सुझाव सार्वजनिक नभएकोप्रति चिन्ता व्यक्त गरिएको छ।
संगठनले समितिको प्रतिवेदन वा अनुसन्धानको प्रगति विवरण सार्वजनिक गर्न माग गर्दै पारदर्शिताको पक्षमा दृढ रहने बताएका छन्। साथै, उनीहरूले यस्ता गम्भीर विषयहरूमा जनचासो अनुरूप जवाफ दिन प्रशासन जिम्मेवार बन्नुपर्ने आवश्यकता औंल्याएका छन्।
