जगरनाथपुर गाउँपालिका वडा नम्बर ४ अन्तर्गत सोहरी गाउँमा बसोबास गर्दै आएका एक विपन्न दलित परिवारसहित स्थानीय बासिन्दाहरूका लागि खानेपानीको समस्या समाधानतर्फ सानो तर महत्वपूर्ण पहल गरिएको छ। लामो समयदेखि स्वच्छ पिउने पानीको अभाव झेल्दै आएका स्थानीयका लागि चापाकल (हाते पम्प) जडान गरिएको हो, जसबाट कुल सात परिवार प्रत्यक्ष रूपमा लाभान्वित भएका छन्।
यो सहयोग जनमत पार्टीको तर्फबाट मेयर पदका प्रत्याशी बृजेश्वर चौधरीद्वारा प्रदान गरिएको हो। चापाकल जडानपछि अब स्थानीयवासीहरूलाई पिउने पानीका लागि टाढा–टाढा जानु नपर्ने भएको छ, जसले उनीहरूको दैनिक जीवनलाई सहज बनाएको छ। विशेषगरी महिला, बालबालिका र वृद्धवृद्धालाई पानी बोकेर लामो दूरी तय गर्नुपर्ने समस्या कम भएको स्थानीयको भनाइ छ।
स्थानीय बासिन्दाहरूले यस सहयोगको खुलेर प्रशंसा गर्दै यस्ता साना तर प्रभावकारी पहलहरूले समुदायमा सकारात्मक परिवर्तन ल्याउने बताएका छन्। उनीहरूका अनुसार आधारभूत आवश्यकतामा गरिएको सहयोगले जनजीवनमा प्रत्यक्ष राहत पुर्याउँछ।
मेयर पदका प्रत्याशी बृजेश्वर चौधरीले आगामी दिनमा पनि विपन्न, दलित तथा पछाडि पारिएका समुदायको हितमा निरन्तर काम गर्ने प्रतिबद्धता व्यक्त गर्दै विकास र समानताको यात्रामा सबैलाई समेटेर अघि बढ्ने आफ्नो उद्देश्य रहेको बताएका छन्।
