जिल्ला सरकारी वकिल कार्यालय, पर्साको आयोजनामा वीरगञ्ज महानगरपालिका–१३ स्थित वीरगञ्ज स्कुल अफ ल मा “समुदायमा सरकारी वकिल” संवाद कार्यक्रम सम्पन्न भएको छ। कार्यक्रमको अध्यक्षता जिल्ला न्यायाधिवक्ता मनोज प्रसाद गुप्ताले गर्नुभएको थियो।
कार्यक्रमका प्रमुख अतिथि क्याम्पस प्रमुख अधिवक्ता चन्द्रिका पटेल रहनुभएको थियो भने अतिथिको रूपमा उपप्राध्यापक सन्तोष यादवको उपस्थिति रहेको थियो। साथै, त्यहाँ अध्ययनरत BALLB का करिब ४० जना विद्यार्थीहरूको उल्लेखनीय सहभागिता रहेको आयोजकले जनाएको छ।
कार्यक्रममा सहभागी विद्यार्थीहरूले कानुनी विषयमा जिज्ञासा राख्दै अन्तरक्रियामा सक्रिय सहभागिता जनाएका थिए। अध्यक्ष गुप्ताले सरकारी वकिलको काम, कर्तव्य तथा जिम्मेवारीबारे विस्तृत जानकारी दिँदै न्याय प्रणालीमा यसको महत्वपूर्ण भूमिका रहेको उल्लेख गर्नुभयो।
कार्यक्रमका क्रममा लागू औषध सम्बन्धी अपराध, बलात्कार, जबर्जस्ती करणी, बाल विवाह लगायतका मुद्दाहरूबारे जानकारी दिइनुका साथै सहभागीहरूसँग खुला संवाद तथा अन्तरक्रिया गरिएको थियो। यस्ता कार्यक्रमले विशेषगरी विद्यार्थीहरूमा कानुनी सचेतना अभिवृद्धि गर्न महत्वपूर्ण योगदान पुर्याउने विश्वास व्यक्त गरिएको छ।
कार्यक्रमको सञ्चालन ना.सु. कृष्ण बिहारी राय यादवले गर्नुभएको थियो भने स्वागत मन्तव्य सहायक जिल्ला न्यायाधिवक्ता अनन्तराज न्यौपानेले राख्नुभएको थियो।
