रक्सौलस्थित सूर्य मन्दिर छठ घाटमा लोक आस्थाको महान पर्व चैती छठ पूजा बुधबार बिहान उदीयमान सूर्यलाई अर्घ्य अर्पण गर्दै श्रद्धा, भक्ति र उल्लासपूर्ण वातावरणमा सम्पन्न भएको छ।
बिहानैदेखि छठव्रती महिला तथा पुरुषहरू घाटमा भेला भई परम्परागत विधि–विधानअनुसार भगवान सूर्यको पूजा–अर्चनामा लीन भएका थिए। सूर्यका पहिलो किरणहरू जलमा प्रतिबिम्बित हुने बित्तिकै व्रतीहरूले जलमै उभिएर अर्घ्य अर्पण गर्दै परिवारको सुख–समृद्धि, उत्तम स्वास्थ्य र मंगलकामनाका लागि प्रार्थना गरेका थिए।
घाट क्षेत्रमा “छठी मइया”का जयकार र भजन–कीर्तनले वातावरण पूर्ण रूपमा भक्तिमय बनेको थियो। श्रद्धालुहरूको ठूलो भीडका बीच व्यवस्था मिलाउन सूर्य मन्दिर समितिका सदस्यहरू तथा स्थानीय प्रशासनको सराहनीय भूमिका रहेको थियो।
यस अवसरमा समितिका सचिव शम्भु प्रसाद चौरसिया तथा मिडिया प्रभारी रजनीश प्रियदर्शीले संयुक्त रूपमा जानकारी दिँदै सूर्य मन्दिर समितिले सरसफाइ, प्रकाश व्यवस्था, सुरक्षा लगायत आवश्यक सम्पूर्ण तयारी गरेको बताए। साथै रक्सौल प्रहरीले पनि सुरक्षा व्यवस्थालाई कडाइका साथ कार्यान्वयन गरेकोले व्रती तथा श्रद्धालुहरूलाई कुनै असुविधा नभएको जनाइएको छ।
उनीहरूले चार दिनसम्म सञ्चालन भएको यस पवित्र पर्वको समापन भक्तजनहरूको अनुहारमा आस्था, सन्तोष र आध्यात्मिक ऊर्जा झल्किएको अवस्थामा भएको बताए।कार्यक्रममा शम्भु प्रसाद चौरसिया, गणेश अग्रवाल, रजनीश प्रियदर्शी, सुरेश कुमार, राजु गुप्ता, पप्पु गोस्वामी तथा अनिल कुमार लगायत समितिका सदस्यहरू व्यवस्थापनमा सक्रिय रूपमा खटिएका थिए।उक्त जानकारी समितिका मिडिया प्रभारी रजनीश प्रियदर्शीले दिएका हुन्।
