शनिबार रक्सौलस्थित पंकज टॉकीज हलमा ग्रो जीनियस प्ले स्कुलको तेस्रो वार्षिकोत्सव उत्साह, उमंग र भव्यताका साथ सम्पन्न भएको छ। “उडान” विषयवस्तुमा आधारित कार्यक्रममा नानीबाबुहरूले आफ्ना सपना, प्रतिभा र आत्मविश्वासलाई मञ्चमार्फत जीवन्त रूपमा प्रस्तुत गरेका थिए। उनीहरूको मनमोहक प्रस्तुतिले दर्शकहरूको मन जित्दै हलभरि लामो समयसम्म तालीको गुञ्जन सुनिएको थियो।
कार्यक्रमको उद्घाटन रक्सौलका एसडीएम मनीष कुमार, अवर निबन्धक आशीष अग्रवाल, नगर परिषदकी कार्यकारी सभापति पुष्पा देवी, श्री सत्यनारायण मारवाडी पंचायती मन्दिरका सचिव कैलाशचन्द काबरा, गरिमा म्याम, सुप्रिया डोलिरिया, अखिल भारतीय मारवाडी महिला सम्मेलनकी अध्यक्ष सोनु काबरा, महिला तथा बाल विकास प्रमुख वीणा गोयल, भारत विकास परिषद रक्सौलका अध्यक्ष रजनीश प्रियदर्शी, पंकज टॉकीज तथा पंकज वाटिकाका सञ्चालक पंकज बरनवाल, अजय कुमार तथा विद्यालयकी निर्देशिका शिखा रंजनले संयुक्त रूपमा दीप प्रज्वलन गरी गरेका थिए। त्यसपछि राष्ट्रगान र गणेश वन्दनासहित कार्यक्रम विधिवत् सुरु गरिएको थियो। कार्यक्रममा उपस्थित अतिथिहरूलाई विद्यालयका तर्फबाट पुष्पगुच्छ प्रदान गरी सम्मान गरिएको थियो।
वार्षिकोत्सवमा ठूलो संख्यामा अभिभावक तथा नगरका विशिष्ट व्यक्तिहरूको उपस्थिति रहेको थियो। बालबालिकाहरूले प्रस्तुत गरेको रेट्रो नृत्य, कथा वाचन, नारी शक्ति, योग, नेपाली नृत्य, “आरम्भ है प्रचण्ड”, फादर–डटर तथा फादर–सन नृत्य लगायत विविध आकर्षक प्रस्तुतीहरूले कार्यक्रमलाई झन् जीवन्त बनाएका थिए। गीत, नृत्य र अभिनयमार्फत दिएका सन्देशले दर्शकहरूलाई भावविभोर बनाएको थियो। शारदा कला केन्द्रका विद्यार्थीहरूले प्रस्तुत गरेको गणेश वन्दनाले कार्यक्रमको आकर्षण बढाएको थियो।
“उडान” थिममार्फत बालबालिकाहरूले आफ्ना सपना पूरा गर्ने प्रेरणादायी सन्देश दिएका थिए, जसले उपस्थित सबैलाई विशेष रूपमा प्रभावित पारेको थियो।यस अवसरमा एसडीएम मनीष कुमारले बालबालिकाको सर्वाङ्गीण विकासमा शैक्षिक संस्थाको महत्वपूर्ण भूमिका हुने उल्लेख गर्दै प्रारम्भिक शिक्षा नै उज्ज्वल भविष्यको आधार भएको बताए। यस्ता सांस्कृतिक कार्यक्रमले बालबालिकाको आत्मविश्वास, सिर्जनात्मकता र प्रतिभा विकासमा महत्वपूर्ण योगदान पुर्याउने उनले बताए। उनले विद्यालयले प्रदान गरिरहेको गुणस्तरीय शिक्षा र संस्कारको प्रशंसा समेत गरे।
कार्यक्रमभर अभिभावकहरूले बालबालिकाको हौसला बढाउँदै उनीहरूको प्रस्तुतीको खुलेर प्रशंसा गरेका थिए। केही प्रस्तुतीहरूमा सामाजिक सन्देश समेत समेटिएको थियो, जसलाई दर्शकहरूले विशेष रुचिका साथ अवलोकन गरेका थिए।समारोहको अन्त्यमा उत्कृष्ट प्रदर्शन गर्ने बालबालिकाहरूलाई मेडल, मोमेन्टो तथा प्रमाणपत्र प्रदान गरी सम्मान गरिएको थियो। कार्यक्रमको सञ्चालन नेहा कुशवाहा र अदिति शाहले प्रभावकारी रूपमा गरेका थिए।
अन्त्यमा विद्यालयकी निर्देशिका शिखा रंजनले सम्पूर्ण अतिथि, अभिभावक तथा सहयोगीप्रति आभार व्यक्त गर्दै बालबालिकालाई शिक्षा सँगसँगै संस्कार दिनु र उनीहरूको लुकेको प्रतिभा उजागर गर्नु विद्यालयको मुख्य उद्देश्य रहेको बताइन्, ताकि उनीहरूले जीवनमा उच्च “उडान” भर्न सकून्।
कार्यक्रममा रजनीश प्रियदर्शी, अजय कुमार, पंकज बरनवाल, अमित उपाध्याय, गोपाल काबरा, अनुराधा शर्मा, ज्योतिराज गुप्ता, रञ्जन कुमार तथा विद्यालयका शिक्षक–शिक्षिकाहरू पायल, अल्का, शिवानी, अनु, संजना, ऋतिका, सुहाना, साक्षी, आकृति र अदिति लगायत नगरका थुप्रै गणमान्य व्यक्तिहरूको उपस्थिति रहेको थियो।
