पर्सा जिल्लाको पर्सागढी नगरपालिका–३, विरुवा टोलका ३० वर्षीय विश्वनाथ सहनीले आफ्नै २५ वर्षीया श्रीमती हरिकला देवी सहनीमाथि घरायसी विवादका कारण योजनाबद्ध रूपमा क्रुर आक्रमण गरेका छन्। उनले धारिलो हतियार (दाउ) प्रयोग गरी श्रीमतीको बायाँ खुट्टा काटी गम्भीर घाइते बनाएका थिए। घटनापछि सहनी श्रीमतीलाई रगताम्मे अवस्थामा छाडेर फरार भएका थिए।घटनाको जानकारी पाएपछि प्रहरी टोली खटिई अनुसन्धान सुरु गरिएको थियो। फरार रहेका सहनीलाई प्रहरीले पक्राउ गरी आवश्यक कानुनी प्रक्रिया अगाडि बढाएको जनाएको छ।
घटनापछि पीडित हरिकला देवी सहनीको अवस्था गम्भीर रहेको र उपचार भइरहेको जनाइएको छ। यसैबीच, पीडित परिवारको आर्थिक अवस्था कमजोर रहेको देखिएपछि सहयोगका लागि पहल गरिएको थियो।
जिल्ला स्तरीय लैङ्गिक हिंसा सञ्जाल समिति कोषबाट पीडित परिवारलाई राहत स्वरूप नगद रु. ५०,१०५ (पचास हजार एक सय पाँच रुपैयाँ) बराबरको चेक प्रदान गरिएको छ। उक्त चेक जिल्ला प्रहरी कार्यालय पर्साका प्रमुख प्रहरी उपरीक्षक सुदिप राज पाठकद्वारा पीडितका आमा–बुवालाई हस्तान्तरण गरिएको हो।
स्थानीयवासी तथा सरोकारवालाहरूले यस्ता घटनाको पुनरावृत्ति रोक्न कडा कानुनी कारबाही र जनचेतना आवश्यक रहेको बताएका छन्। प्रहरीले पनि घरेलु हिंसाविरुद्ध शून्य सहनशीलताको नीति अपनाउँदै दोषीलाई कानुनी दायरामा ल्याइने प्रतिबद्धता जनाएको छ।
