अभिलाष गुप्ता
बैशाख १८ बिरगंज
नेपाल भारत सीमाको दुवैतर्फ परिचयपत्र अनिवार्य गर्ने विषयको समाचारमा कुनै सत्यता नभएको पुष्टि भएको छ । बिहीबार बिहानैदेखि नेपाल भारतको सीमाक्षेत्रका दुवैतर्फ आवतजावत गर्दा परिचयपत्र अनिवार्य देखाउनुपर्ने नियम लागू भएको भन्ने समाचार र सामाजिक सञ्जालहरुमा देखिन पाइएको थियो ।
सामाजिक सञ्जालमा भएको टिक्काटिप्पनीले समाचारहरु आएको भन्दै त्यो कुनै आधिकारिक रुपमा नभएको पर्साका प्रमुख जिल्ला अधिकारी गणेश अर्यालले बताए । साथै रक्सोल पुगेर आएका नेपाली र नेपाल प्रवेश गर्नेहरुलाई भने सीमाक्षेत्रमा दैनिक गरिने सुरक्षा चेकजाँच बाहेकका कुनै पनि कागजातहरु नमागिएको भारतको रक्सौल पुगेर आएकाहरुले बताएका छन् ।
नेपालतर्फ पनि सीमाक्षेत्रमा चेकजाँचमा खटिएका सुरक्षाकर्मीहरुले दैनिक गर्ने चेकजाँच बाहेक कुनै किसिमको परिचय पत्र मागेका छैनन् । भारतीय सीमा सुरक्षा बल एसएसबी र नेपालको सीमा सुरक्षा बल सशस्त्र प्रहरीको संयुक्त बैठकमा सीमाक्षेत्रमा गरिने निगरानी थप प्रभावकारी बनाउने बाहेकका अन्य कुनै औपचारिक सहमति र निर्णयहरु भने नभएको जानकारी दिए ।
भारतको काश्मिरको पर्यटकीय स्थल पहलगाममा भएको आतंकारी हमलापछि नेपाल भारतको सीमाक्षेत्रमा दुवैतर्फका सुरक्षा निकायले नियमित चेकजाँचलाई थप प्रभावकारी बनाउन निगरानी बढाउनु बाहेक अन्य परिचय पत्र भन मागिएको छैन । सीमा नाकामा नेपालतर्फ प्रहरीले ‘स्पेशल डग’ सहित सुरक्षा जाँच पहिलेदेखि नै गरिरहेको छ ।
सीमाक्षेत्रमा परिचय पत्र देखाउनु पर्ने नियमको विषयमा कहीपनि औपचारिक बैठकहरु नभएको र यस विषयमा कुनै आधिकारिक जानकारी पनि नआएको वीरगन्ज स्थित भारतीय महावाणिज्यदूतावास स्रोतले पनि जनाएको छ ।
