अभिलाष गुप्ता
वीरगंज,०७ साउन
जिल्ला ट्राफिक प्रहरी कार्यालय वीरगंज, पर्साका प्रहरी निरीक्षक लोकराज भट्टले आफ्नो नेतृत्वमा प्राप्त उल्लेखनीय उपलब्धिका कारण नेपाल प्रहरी राजमार्ग सुरक्षा तथा ट्राफिक व्यवस्थापन कार्यालय पथलैया, बाराद्वारा असार महिनाको उत्कृष्ट ट्राफिक प्रहरी’पोलिस अफ द मन्थ’ उपाधि प्राप्त गरेका छन्।
भट्टको नेतृत्वमा जिल्ला ट्राफिक प्रहरी कार्यालय पर्सा र मातहतका टोलीहरूले विभागीय मूल्य, मान्यता र आदेश–निर्देशनलाई उच्च प्राथमिकता दिँदै इमान्दार, बफादार, कर्तव्यनिष्ठ, अनुशासित र लगनशील भएर कार्य गर्दै आएका छन्। सडक सुरक्षामा सुधार, ट्राफिक जनचेतनाको विस्तार र व्यवस्थापनमा उत्कृष्ट नेतृत्व देखाएको भन्दै भट्टलाई यो सम्मान प्रदान गरिएको हो।
राजश्व संकलनमा अग्रणी भूमिका
सम्पन्न आर्थिक वर्षमा वीरगंज ट्राफिक प्रहरी कार्यालयले अघिल्लो वर्षको तुलनामा उल्लेखनीय प्रगति हासिल गर्दै मधेश प्रदेशका ८ वटै जिल्ला ट्राफिक प्रहरी कार्यालयमध्ये सर्वाधिक राजश्व संकलन गरेको छ। राजश्व संकलनमा कार्यालयको सक्रियताले प्रदेशमै उत्कृष्ट उदाहरण प्रस्तुत गरेको छ।
ट्राफिक व्यवस्थापन र जनचेतना अभियान
भट्टको नेतृत्वमा वीरगंज ट्राफिक प्रहरीले शहर र आसपासका क्षेत्रमा उत्तम ट्राफिक व्यवस्थापन, सडक दुर्घटनामा कमी ल्याउने उपाय र विभिन्न जनचेतनामूलक कार्यक्रम सञ्चालन गरेको छ। सडक नियम पालन गराउन सघाउने, यात्रु र सवारी चालकबीच ट्राफिक सचेतना बढाउने तथा सडक सुरक्षासम्बन्धी निरन्तर अभियनका कारण वीरगंजको ट्राफिक अवस्था सुधारिएको छ।
भट्टको प्रतिबद्धता र उपलब्धि
भट्टले आफ्नो टोलीसँगै विगत एक वर्षमा सडक सुरक्षालाई प्राथमिकता दिँदै कडाइका साथ नियमको कार्यान्वयन गराउनुका साथै, सामाजिक उत्तरदायित्वका कार्यक्रमहरूमा समेत सक्रिय भूमिका निर्वाह गर्दै आएका छन्। उनका अनुसार, “ट्राफिक व्यवस्थापनलाई आधुनिक र अनुशासित बनाउँदै सडक दुर्घटनाको जोखिम घटाउने” मुख्य उद्देश्य हो।
प्रशंसा र अपेक्षा
राजमार्ग सुरक्षा तथा ट्राफिक व्यवस्थापन कार्यालय पथलैयाले भट्टको नेतृत्व र टोलीको कार्यसम्पादनको उच्च मूल्यांकन गर्दै यस प्रकारको उत्कृष्ट कार्यले अन्य जिल्लाका ट्राफिक प्रहरीलाई पनि प्रेरणा दिने विश्वास व्यक्त गरेको छ।
भट्टको यस उपलब्धिले वीरगंज मात्र नभई सम्पूर्ण मधेश प्रदेशमा ट्राफिक व्यवस्थापनलाई अझ सुदृढ र व्यवस्थित बनाउन योगदान पुग्ने अपेक्षा गरिएको छ।
