नवरात्रिको पावन अवसरमा लायन्स क्लब अफ नवदीप एकेडेमीको आयोजनामा दुर्गा माताको पूजा, सन्ध्या आरती तथा प्रसाद वितरण कार्यक्रम सम्पन्न भएको छ।
नवरात्रिको षष्ठी तिथिको शुभ अवसरमा वीरगञ्जस्थित बीपीसी कलेज नजिकै रहेको दुर्गा माताको मन्दिरमा उक्त धार्मिक कार्यक्रम आयोजना गरिएको हो। कार्यक्रममा दुर्गा माताको विधिपूर्वक पूजा–आराधना गर्नुका साथै सन्ध्या आरती गरी उपस्थित भक्तजनलाई प्रसाद वितरण गरिएको थियो।
लायन्स क्लब अफ नवदीप एकेडेमीकी अध्यक्ष लायन सुशिला साहको अध्यक्षतामा सम्पन्न कार्यक्रममा क्लबका सदस्य तथा स्थानीय भक्तजनहरूको सहभागिता रहेको थियो। कार्यक्रममा लायन सुनिल गुप्ता, लायन विजय कुशवाहालगायतको उपस्थिति रहेको थियो।
नवरात्रिको अवसरमा आयोजना गरिएको पूजा, आरती तथा प्रसाद वितरण कार्यक्रमले धार्मिक आस्था, श्रद्धा र सामाजिक सद्भावलाई थप मजबुत बनाउने विश्वास गरिएको छ। यस्ता धार्मिक गतिविधिले समाजमा आपसी एकता, भाइचारा र सांस्कृतिक परम्पराको संरक्षणमा समेत योगदान पुर्याउने अपेक्षा गरिएको छ।
नवरात्रि हिन्दू धर्मावलम्बीहरूको महत्त्वपूर्ण पर्व हो। यस अवधिमा माता दुर्गाका विभिन्न स्वरूपको पूजा–आराधना गरिन्छ। भक्तजनहरूले दुर्गा माताको आराधना गर्दै परिवारको सुख, शान्ति, समृद्धि तथा समाजको कल्याणको कामना गर्ने परम्परा रहिआएको छ।
लायन्स क्लब अफ नवदीप एकेडेमीले धार्मिक तथा सामाजिक गतिविधिमा सहभागिता जनाउँदै आएको सन्दर्भमा नवरात्रिको अवसरमा आयोजित यस कार्यक्रमले धार्मिक वातावरणलाई थप भक्तिमय बनाएको थियो।
