मिथिला कलाप्रति रुचि राख्ने तथा यसको मौलिक कला र सांस्कृतिक परम्पराबारे सिक्न चाहनेहरूका लागि वीरगञ्जमा आयोजित ‘बेसिक मिथिला आर्ट वर्कसप’ सम्पन्न भएको छ।
Mithila Chitrashalaको आयोजनामा वीरगञ्ज पब्लिक कलेजको भवन, पानीटंकीमा आइतबार कार्यशाला सम्पन्न भएको हो।
कार्यशालामा सहभागीहरूले मिथिला कलाको इतिहास तथा यसको सांस्कृतिक महत्व, मिथिला चित्रकलामा प्रयोग हुने विभिन्न आकृति, प्रतीक र शैलीका बारेमा जानकारी प्राप्त गरेका थिए। साथै मिथिला चित्रकलामा परम्परागत तथा आधुनिक रूपमा प्रयोग हुने सामग्रीबारे समेत प्रशिक्षण दिइएको थियो।
अनुभवी कलाकार रिचा कर्णले कार्यशालामा प्रशिक्षण तथा मार्गदर्शन गरेकी थिइन्। सहभागीहरूले कलाकारसँग प्रत्यक्ष अन्तरक्रिया गर्दै आफ्ना जिज्ञासा राख्नुका साथै मिथिला चित्रकलाबारे सुझाव र प्रतिक्रिया समेत लिएका थिए।
कार्यशालाको मुख्य आकर्षणका रूपमा सहभागीहरूले आफैंले मिथिला चित्र बनाउने व्यावहारिक अभ्यास समेत गरेका थिए। आयोजकले आवश्यक कला सामग्री उपलब्ध गराएको थियो। सहभागीहरूले आफूले तयार गरेको मिथिला कलाकृति घरमा लैजान सक्ने व्यवस्था समेत गरिएको थियो।
कार्यशालामा सहभागी हुन प्रति व्यक्ति ३०० रुपैयाँ शुल्क तोकिएको थियो भने अधिकतम ३० जना सहभागी सहभागी भएका थिए।
मिथिला कलामा रुचि राख्ने कला प्रेमी, पहिलोपटक चित्रकला सिक्न चाहने तथा मिथिला संस्कृतिको समृद्ध परम्पराबारे जान्न इच्छुक व्यक्तिहरूले कार्यशालामार्फत मिथिला कलाबारे प्रत्यक्ष रूपमा सिक्ने अवसर प्राप्त गरेका थिए।
‘सिकौँ, सिर्जना गरौँ र संरक्षण गरौँ’ भन्ने उद्देश्यसहित आयोजना गरिएको कार्यशालाले मिथिला कलाको संरक्षण, प्रवर्द्धन तथा नयाँ पुस्तामा यसको ज्ञान हस्तान्तरण गर्न योगदान पुर्याउने आयोजकको विश्वास छ।
