बाढीको पीडाबीच आस्था र आशाको पुकार ‘बाढीमा बिहार, छठी मैया खेवनहार’
बिहारमा आएको बाढीको त्रासदीबीच आमजनजीवनको पीडा र आस्थालाई स्वर दिँदै भोजपुरी गीत ‘बाढीमा बिहार, छठी मैया खेवनहार’ सार्वजनिक भएको छ। लोकप्रिय अभिनेत्री तथा गायिका अक्षरा सिंहको भावपूर्ण आवाजमा सार्वजनिक भएको यो गीत विपद्को घडीमा आशा, विश्वास र प्रार्थनाको आवाज बनेर आएको छ।
गीतका रचनाकार मनोज भावुकले बाढीबाट प्रभावित घर–परिवार, खेतबारी तथा सर्वसाधारणको पीडालाई सरल र मार्मिक शब्दमा प्रस्तुत गरेका छन्। गीतमा दुर्गा मइया र छठी मइयासँग बिहारको संकट टारिदिन तथा जीवनको नैया पार लगाइदिन प्रार्थना गरिएको छ। गीतको भावनाअनुसार मधुकर आनन्दले करुणा र आशाले भरिएको संगीत दिएका छन्।
अक्षरा सिंहले आफ्नो सशक्त तथा भावपूर्ण गायनमार्फत गीतमा रहेको पीडा र प्रार्थनालाई अझ गहिराइ दिएकी छन्। बाढीका क्रममा उनी स्वयं बिहार पुगेर पीडितहरूको सहयोगमा समेत जुटेकी थिइन्। बिहारका नागरिकको पीडालाई नजिकबाट अनुभूति गरिसकेकी अक्षराको आवाजमा यस गीतको संवेदना अझ आत्मीय बनेको छ।
भोजपुरी साहित्य तथा संस्कृतिका सक्रिय स्रष्टा मनोज भावुकले यसअघि पनि ‘पलायन के दर्द, सुनऽ ए छठी मइया’ र ‘जागे यूपी–बिहार’ जस्ता गीतमार्फत सामाजिक सरोकारका विषयलाई आवाज दिँदै आएका छन्। ‘बाढीमा बिहार, छठी मैया खेवनहार’ पनि उनको यही सामाजिक तथा सिर्जनात्मक संवेदनाको निरन्तरता रहेको छ।
गीतमा बाढीको विपत्तिबीच बिहारका नागरिकले भोगिरहेको पीडासँगै कठिन समय पार हुने र आशाको नैया सुरक्षित किनारमा पुग्ने विश्वाससमेत व्यक्त गरिएको छ।
