वीरगञ्जस्थित ज्ञानदा एकेडेमी स्कुलमा विद्यार्थीहरूमा वातावरण संरक्षण, सरसफाइ तथा दिगो विकासप्रति सचेतना अभिवृद्धि गर्ने उद्देश्यले ‘दिगो विकास क्लब’ तथा ‘स्वच्छ वातावरण अभियान’को स्थापना समारोह सम्पन्न भएको छ।
विद्यालय परिसरमा आयोजित कार्यक्रममा विद्यालयका सीईओ तथा प्रिन्सिपल राजेन्द्र प्रसाद कोइरालाको विशेष उपस्थितिमा कार्यक्रम सम्पन्न भएको हो। कार्यक्रममा विद्यालयका विद्यार्थीहरूको उल्लेखनीय सहभागिता रहेको थियो।
कार्यक्रममा प्रमुख अतिथिका रूपमा वीरगञ्ज महानगरपालिकाका हरियाली संयोजक तथा ग्रीन सिटी सामुदायिक प्रहरी सेवा केन्द्र, आदर्शनगरका अध्यक्ष जय प्रकाश खेतानको विशेष उपस्थिति रहेको थियो। कार्यक्रममा वातावरण संरक्षण, हरियाली प्रवर्द्धन, सरसफाइ तथा विद्यालय तहबाटै वातावरणमैत्री व्यवहारको विकास गर्नुपर्ने विषयमा जोड दिइएको थियो।
दिगो विकास क्लबको स्थापनासँगै विद्यार्थीहरूलाई वातावरण संरक्षण तथा सामाजिक उत्तरदायित्वका विभिन्न गतिविधिमा सक्रिय रूपमा सहभागी गराउने लक्ष्य राखिएको विद्यालयले जनाएको छ। क्लबमार्फत विद्यालय परिसर तथा आसपासको क्षेत्रको सरसफाइ, वृक्षरोपण, हरियाली प्रवर्द्धन, फोहोर व्यवस्थापन तथा वातावरणसम्बन्धी जनचेतनामूलक कार्यक्रम सञ्चालन गरिने बताइएको छ।
कार्यक्रममा बोल्दै प्रमुख अतिथि जय प्रकाश खेतानले वातावरण संरक्षण केवल कुनै एक व्यक्ति वा संस्थाको जिम्मेवारी नभई सबैको साझा दायित्व भएको बताए। उनले विद्यालय तहबाटै विद्यार्थीहरूमा स्वच्छता, हरियाली र वातावरण संरक्षणसम्बन्धी सकारात्मक संस्कारको विकास गर्न सके त्यसले समाजमा दीर्घकालीन प्रभाव पार्ने धारणा व्यक्त गरे।
त्यस्तै, विद्यालयका सीईओ तथा प्रिन्सिपल राजेन्द्र प्रसाद कोइरालाले विद्यार्थीहरूको शैक्षिक विकाससँगै उनीहरूलाई सामाजिक तथा वातावरणीय जिम्मेवारीप्रति सचेत बनाउनु विद्यालयको महत्वपूर्ण दायित्व भएको बताए। उनले दिगो विकास क्लबमार्फत विद्यार्थीहरूको नेतृत्व क्षमता, सामाजिक जिम्मेवारी र वातावरण संरक्षणप्रतिको व्यवहारिक ज्ञान अभिवृद्धि हुने विश्वास व्यक्त गरे।
कार्यक्रममा विद्यालयका शिक्षक, कर्मचारी तथा विद्यार्थीहरूको सहभागिता रहेको थियो। कार्यक्रमले विद्यालयमा स्वच्छ, हराभरा तथा वातावरणमैत्री शैक्षिक वातावरण निर्माण गर्न थप प्रेरणा प्रदान गरेको आयोजकले जनाएको छ।
