अभिलाष गुप्ता
बिरगंज, जेठ ५
मधेश प्रदेश प्रहरी कार्यालय जनकपुरका प्रमुख प्रहरी नायब महानिरीक्षक (डीआईजी) उमा प्रसाद चतुर्वेदीले पर्सा जिल्लामा प्रहरी संगठनको प्रभावकारी परिचालन र सुधारका विषयमा बृहत निरीक्षण तथा निर्देशन कार्यक्रम सम्पन्न गर्नुभएको छ। जिल्ला प्रहरी कार्यालय पर्सामा आयोजित उक्त कार्यक्रम २०८२ साल जेठ ४ गते साँझ ४:३० बजे सम्पन्न भएको हो।
कार्यक्रमको क्रममा प्रमुख चतुर्वेदीले पर्सा जिल्ला प्रहरी कार्यालयका प्रमुख तथा मातहत इकाइहरूसँग प्रत्यक्ष भेटघाट गरी प्रदेशभित्रको शान्ति सुरक्षा अवस्था, सीमावर्ती अपराध, भन्सार छलि र तस्करी नियन्त्रण, फरार अभियुक्तको खोजी तथा पक्राउ लगायतका विषयमा आवश्यक रणनीतिक निर्देशन दिनुभयो।
प्रहरी परिचालनमा सशक्तता र सजगता आवश्यक
चतुर्वेदीले शान्ति सुरक्षाको स्थायित्वका लागि प्रहरी परिचालनलाई अझ व्यवस्थित, अनुशासित र सजग बनाउनु पर्नेमा जोड दिनुभयो। विशेषगरी सिमावर्ती नाकाहरूबाट हुने अवैध सामान निकासी–पैठारी तथा भन्सार छलिको रोकथाममा तालमेलयुक्त रणनीति आवश्यक रहेको उल्लेख गर्दै, अपराध नियन्त्रणमा प्रविधिमैत्री प्रवृत्ति अपनाउनु पर्ने धारणा व्यक्त गर्नुभयो।
अभियुक्त खोजी, मुद्दा फर्छोट र दुर्घटना न्यूनीकरणमा प्राथमिकता
उहाँले फरार अभियुक्तहरूको पहिचान, खोजी र पक्राउ प्रक्रियामा तीव्रता दिनु पर्ने स्पष्ट निर्देशन दिनुभएको छ। साथै, प्रहरी फाइलमा लामो समयदेखि पेन्डिङ रहेका पुराना मुद्दाहरूको छिटो फर्छोट गरिनु पर्ने र सवारी दुर्घटनाको जोखिम न्यूनीकरणका लागि सडक सुरक्षासम्बन्धी जनचेतना कार्यक्रम, ट्राफिक निगरानी र कानुनी कठोरता लागू गर्नुपर्ने बताउनु भयो।
आचरण सुधार र भौतिक संरचना निरीक्षण
निरीक्षणका क्रममा चतुर्वेदीले प्रहरी आचरण सुधार, सेवा प्रवाहमा पारदर्शिता र जनमैत्री व्यवहारको आवश्यकता औँल्याउनुभयो। कार्यालयका शाखा, हिरासत कक्ष, प्रहरी ब्यारेक, मेस तथा क्यान्टिनको अवस्था समेत प्रत्यक्ष अवलोकन गरी सुधारका सिफारिसहरू गर्नुभएको छ। मानसिक स्वास्थ्य र कार्यदबाबका कारण प्रहरी कर्मचारीहरूमा देखिने आत्महत्याका घटनालाई न्यूनिकरण गर्न मनोसामाजिक सशक्तिकरणका उपायहरू तत्काल लागू गर्नुपर्ने उहाँको भनाइ थियो।
दिगो सुधारका लागि प्रेरक निर्देशन
कार्यक्रममा सहभागी प्रहरी अधिकृतहरूका अनुसार डिआईजी चतुर्वेदीको निरीक्षण र निर्देशनले संगठनमा नयाँ ऊर्जा भरेको छ। उहाँको दूरदर्शी दृष्टिकोण र स्पष्ट कार्ययोजना मार्फत प्रहरी संगठनलाई अझ सक्षम, जवाफदेही र जनउत्तरदायी बनाउने दिशामा महत्त्वपूर्ण आधार तयार हुने विश्वास लिइएको छ।
यस निरीक्षण तथा नीति निर्देशन कार्यक्रमले पर्सा जिल्लासँगै सम्पूर्ण मधेश प्रदेशको प्रहरी प्रशासनलाई थप गतिशील बनाउने अपेक्षा गरिएको छ।
