नेपाल सरकारका खानेपानी मन्त्री प्रदीप यादवले वीरगञ्ज महानगरपालिकालाई दुई थान पिकअप गाडी हस्तान्तरण गरेका छन्। नगरपालिकाको सार्वजनिक सेवा प्रणालीलाई थप प्रभावकारी र सर्वसुलभ बनाउने उद्देश्यले मन्त्री यादवले यो सहयोग प्रदान गरेका हुन्।
एक औपचारिक कार्यक्रममार्फत ती गाडीहरू वीरगञ्ज महानगरपालिकाका मेयर राजेशमान सिंहलाई हस्तान्तरण गरिएको हो। महानगरका प्राविधिक काम तथा अन्य सार्वजनिक सेवा कार्यहरूमा गाडीहरू प्रयोग गरिने जनाइएको छ।
कार्यक्रममा मन्त्री यादवले स्थानीय तहलाई सबल बनाउनु नै समृद्ध नेपालको आधार भएको उल्लेख गर्दै भने, “स्थानीय तहलाई सक्षम बनाउनु नै समृद्ध नेपाल निर्माणको आधार हो। यो सहयोग त्यसैको एउटा सानो प्रयास हो।”
उक्त गाडी सहयोगबाट नगरवासीलाई अझ छिटो, प्रभावकारी र पहुँचयुक्त सेवा प्रदान गर्न मद्दत पुग्ने विश्वास व्यक्त गरिएको छ।कार्यक्रममा विभिन्न स्थानीय जनप्रतिनिधि, महानगरका कर्मचारी, सञ्चारकर्मी तथा सर्वसाधारणको उपस्थिति रहेको थियो। स्थानीय सेवा प्रवाहमा गुणस्तर सुधार ल्याउने अपेक्षासहित नगरपालिकाले गाडीको उपयुक्त प्रयोग गर्ने प्रतिबद्धता जनाएको छ।
